Í 542 m hæð við Ánavatn í landi Brúar rúma 2 km frá Grunnavatni. Þorsteinn Jökull Magnússon var þjóðsagnapersóna er bjó á Brú á seinni hluta 15. aldar Hann var sagður hafa búið a.m.k. eitt ár á Netseli er hann flúði til fjalla undan “pestinni”. Gamlar rústir eru á tanga sem skagar út í Ánavatn að vestan. Sumar eru neðan gjóskulags frá 1477 en aðrar eru frá 18. öldinni og þær yngstu tengjast eflaust ábúðinni á Grunnavatni. Nokkrar heimildir eru fyrir því að fólk kenndi sig við Netsel þótt ekki sé vitað um reglulega ábúð þar.
(4) GPS hnit (N65°12.68 – W15°32.16)
Netsel - Ítarefni og ábúendatal
Netsel er í landi Brúar í 542 m hæð. Nafnið er athyglisvert, vitnar líklega um að silungsveiði hafi verið stunduð mikið í vatninu fyrr á öldum. Það gæti jafnvel verið að veiðiskapur hafi verið eitt aðalstarfið í selbúskapnum. Rústir eru á Netselstanga frá ýmsum tímum, sumar eldri en gjóskulagið svarta frá 1477. Þær yngstu tileyra búsetuskeiði á 18. öld og ef til vill einnig frá 19. og 20. öld.
Þjóðsagnapersónan Þorsteinn Jökull bóndi á Brú, sem talinn er hafa verið uppi um 1500 er sagður hafa búið á Netseli eitt ár, en áður tvö ár á Dyngju í Arnardal. Sagt era ð hann hafi flúið með hyski sitt til að forðast pestarláguna síðari, sem stráfelldi byggðalýðinn. Eftir þrjú ár snéri hann aftur að Brú og var þá hólpinn.
Í manntali 1816 segja systur tvær Kristín og Guðleif Finnbogadætur fæðingarstað sinn vera Netsel. Eftir aldri eru þær fæddar um 1779 og 1780. Árið 1784 deyr í Hofteigssókn á Jökuldal Ásný Eiríksdóttir frá Netseli.
Þessar heimildir sýna að búið var á þessu seli um skamma hríð á 18. öld en sú búseta hefur líklega lagst af í Móðuhallærinu illræmda af völdum Skaftárelda.