Kálffell

KálffellKálffell (440 m) er afbýli frá Fossi.  Bærinn stóð utan við samnefnt fell, norðan Bunguflóa og skammt norðan og vestan við þjóðveg 85.  Óljóst er um upphaf byggðar á Kálffelli en heimildir geta um Bjarna nokkurn Bjarnason, sem fæddur var þar árið 1840.  Sé það rétt er Kálffell með elstu býlum í heiðum Vopnafjarðar. Deildar meiningar eru um hvort rita skuli nafnið með einu f eða tveimur.  Kálffell var lengstum talin ágætis bújörð, engjar víðlendar og grasgefnar og beitiland gott bæði sumar og vetur.  Þó má ætla að landgæðum hafi hrakað með auknum uppblæstri á síðustu áratugum nítjándu aldar. Árið 1911 er jörðin komin í eyði og öll hús ofan tekin og burt flutt.  Eftir standa laglegar tóftir bæjar- og gripahúsa og vekur sérstaka athygli að umgangsdyr fjárhúsa virðast snúa upp í brekkuna.  Gunnar Gunnarsson rithöfundur keypti Kálffell 1932 en sex árum áður hafði hann keypt grannjörðina Arnarvatn.

(20) GPS hnit (N65°35.26 - W15°20.94)

...

Við erum á Facebook