Perla

Bjargselsbotnar

Gengið er frá skilti rétt við Hússtjórnarskólann á Hallormsstað og fylgt stikum ljósgrænum að lit. Leiðin liggur í gegnum framhlaupsurð, sem myndaðist fyrir um 10.000 árum og nefnist Hólar. Áfram er haldið upp í Bjargselsbotna, inn eftir, undir Bjarginu að Þverbjargi þar sem Illaskriða hefur fallið. Út og niður af Illuskriðu er gengið niður að Leirtjarnarhrygg. Þar er að finna hólkinn með gestabók og stimpli.

  • Vegalengd og hækkun:4.5 km og 230 m hækkun.
  • GPS hnit:N65°05.465-W14°43.031

Eiríksstaðahneflar

Gengið frá skilti við Þverá innan við Eiríksstaði á Fremri-Hnefil (947 m). Þar er hólkurinn með gestabók og stimpli. Síðan er gengið á Ytri Hnefil (922 m) ef vilji er til og niður í Eiríksstaði. Gaman er einnig að ganga að Hneflaseli, sem fór í eyði 1875 og halda síðan til baka milli Hneflanna niður í Jökuldal.

  • Vegalengd og hækkun:10 km og 650 m. hækkun
  • GPS hnit:(N65°08.617-W15°28.195)

Fardagafoss

Oftast er gengið frá skilti við bílastæði sem er neðarlega í Fjarðarheiðinni. Gengið er upp með ánni, og má þar sjá Gufufoss. Gengið áfram upp með gljúfurbarminum norðan megin. Þegar komið er að fossinum er hægt að fara ofan í gilið (keðja þar til að styðja sig við). Gaman er að fara bak við fossinn. Hólkur með gestabók og stimpli blasir við þegar fólk nálgast fossinn.
Vilji fólk lengja gönguna er upplagt að ganga frá Egilsstöðum, ganga yfir gömlu Eyvindarárbrúna og fara svo inn á gamla veginn rétt utan við afleggjarann að Miðhúsum.

  • Vegalengd og hækkun:2 km. og 148 m. hækkun
    GPS hnit: (N65°16.06-W14°19.96)

Heiðarendi

Ekið upp fyrir Heiðarsel og beygt inn á slóð til vinstri áður en komið er að Nátthaga. Gengið frá skilti sem er við gamla veginn fyrir ofan Nátthaga. Gengið upp á brún og síðan út eftir til hægri uns komið er að hólknum þar sem er gestabók og stimpill. Gaman er að ganga út Heiðarendann, niður og inn með honum til baka eftir gamla veginum.

  • Vegalengd og hækkun: 6,8 km og 200 m. hækkun
  • GPS hnit:(N65°23.085-W14°33.819)

Heiðarendi er endi Fljótsdalsheiðar sem er heildarnafn á hálendinu milli Jökuldals og Upphéraðs, en ýmsir hlutar heiðarinnar eru nefndir eftir nærliggjandi jörðum. Fornt heiti á þessu svæði er Bótar- og Heiðarselsheiði. Heiðarsel á stórt landssvæði á suðvestanverðri Lágheiði og austanvert á Heiðarenda, þ.e. enda Fljótsdalsheiðar. Spilda Heiðarsels telst til Bótarheiðar þar sem Heiðarsel var hjáleiga frá Bót. Ufsin er hæsti hlutinn í Heiðarselslandi 431 metri. Norðvestur af Ufs er Miðheiðarháls sem nær út á Heiðarenda. Vestan við Ufs er svonefndur Grafningur í norðaustur af honum er Sauðadalur, norðvestur af Sauðadalsenda er botn nefndur Djúpibotn, þar í norðaustur tekur við Dimmidalur sem nær út undir þjóðveg.

Eyðibýlið Fagriflötur er í Heiðarselslandi, spölkorn utan við tún (rústir), en þó er það ekki á þeim Fagrafleti sem er örnefni þar skammt frá. Einnig eru óljós munnmæli um að býli hafi verið á Leiðvelli, niður af bæ handan áss. Þar voru beitarhús og nafnið þykir benda til að staðurinn dragi nafn af leiðarþinghaldi að fornu. Bærinn Nátthagi sem stendur á lóð úr Heiðarselslandi er hæsti bær yfir sjávarmáli í Hróarstungu um 230m.

Ærhamar

Fyrir langa löngu bjó bóndi í Bót í Hróarstungu. Ekki getur um nafn hans. Bóndi var í vináttu við huldukonu. Hún sagði honum fyrir um órðna viðburði og réð honum mög heilræði. Voru því kærleikar með þeim. Á hverju hausti kom hún á réttarvegg og sagði bónda hvað feigt væri af fénu. Lógaði hann því strax og missti svo aldrei kind á vetrum og varð hann auðugur mjög af sauðfé.

Eitt haust sem vant var kom hún á réttarvegginn, lítur yfir féð og mælti: “Allur er nú sauðurinn feigur utan þú, úrþvættið Kolla, og verður þó hætt einu auganu nema vel verði, Kollukind”.

Þegar hún sagði þetta benti hún á kollótta kind væskilslega. Bóndi vildi eigi trúa vinkonu sinni og lógaði fáu um haustið. En vetur sá næsti varð hinn mesti víkingur svo bóndi felldi allt fé sitt. En Kolla, sem bóndi kallaði Mókollu, komst á hamar milli Heiðarsels og Fremrasels norðanvert á Lágheiði og gekk þar úti og græddi bóndi út af henni mikinn kynstofn. Hamarinn er síðan kallaður Ærhamar.

Hvannárgil - Perla

Sunnudagsganga 3. júlí kl. 10.00. 1skor1skor1skor

Ekið í áttina að Möðrudal, Kverkfjallaleið að Kjólsstaðaá. Gilið er í þrem hlutum, fögur náttúrusmíð. Göngulengd 12-16 km. hringleið.

Umsjón: Sigurjón Bjarnason.

Ferðafélag Fljótsdalshéraðs - Tjarnarási 8 - 700 Egilsstaðir - (Pósthólf 154) - This email address is being protected from spambots. You need JavaScript enabled to view it. - sími: 863 5813